Saterdag van 09:00-17:30.

Kry jou wederhelf entoesiasties uit die bed, eet 'n lekker ontbyt en kom meld dan aan by Casablanca Manor in Donkerhoek (slegs 16 km vanaf Pta Oos). Daar is 'n koffietjie om jou deur die aanmeldproses te help. Nadat ons beter voel, spring ons sommer weg met die eerste sessie wat handel oor wat 'n huwelik nou eintlik is en hoekom dit so belangrik is. Elke sessie gedurende hierdie seminaar begin met Huwelied wat 'n toepaslike lied of twee sing. 

 

Hierna gaan ons die praktiese aspekte van die huwelik aanspreek en dit behels:

 

As jou man smile... Hoe om jou man gelukkig te maak en te hou. Wat is 'n man se grootste behoeftes? Die rol van 'n man in die huwelik en ook in sy gesin. Mans is uniek en is nie veronderstel om 'n vrou of soos 'n vrou te wees nie. Daar is 'n baie goeie rede dat 'n man 'n man moet wees! Leer hoe om die man te wees wat God jou geskep het om te wees.

 

 

 

 

 

 

As jou vrou smile... Hoe om jou vrou gelukkig te maak en te hou. Wat is 'n vrou se grootste behoeftes? Die rol van 'n vrou in die huwelik en ook in die gesin. 'n Vrou stel die ander gedeelte van God ten toon, wat nie deur 'n man gewys kan word nie. Albei is belangrik en albei moet uniek aan hulle geslag wees. Ons is geskep as komplimentêre.

 

 

 

 

 

As jou kind smile... Hierdie gesprek is nie met kinders nie, dis met die ouers oor hoe om hulle kinders groot te kry sonder om moord te pleeg, of om met tieners te sit wat jy wens jy op 'n skip kon sit. Hierdie sessie gaan weereens prakties wees en ook God se opinie vir jou gee oor die fantastiese voorreg wat jy het om kinders groot te kan maak.

 

Dis 'n mondvol, maar ons gaan dit darem nie in een sitting aanpak nie! Ons gaan 10:30 eers 'n bietjie asemhaal en ietsie sluk. Teen 12:30 gaan ons behoorlik rus en tyd maak sodat jy 'n middagete kan geniet. Halfpad na 17:30 sal ons weer stil raak vir interne versterking. Aan die einde van hierdie sessies kan almal moeg, maar verryk, huiswaarts keer. Die aanbieders is egter beskikbaar vir so lank as wat dit nodig is om te praat, bid, ens. vir diegene wat dit nodig het.

 

Sondag om 09:00.

Meld weer aan vir die gebruiklike koffietjie. Daarna val ons weer weg met:

 

Kommunikasie. Hoe om die ander, onverstaanbare geslag te probeer verstaan. Minstens, kom kry skietgoed om jou te help om sinvol en liefdevol te kommunikeer sodat julle nader aan mekaar kan groei, ten spyte van julle verskille.

 

 

 

 

 

 

Geestelike realiteite. 'n Praktiese sessie waarin ons gaan kyk na die algemeenste geestelike aanslae op huwelike. Ons gaan julle ook help om dit te hanteer en om vry te kom van alles wat julle geestelik kan terughou om in God se volheid as egpaar te lewe. Hierdie gedeelte maak ons aanbieding van huwelikseminare uniek. Ons poog om so 'n volledig as moontlik seminaar aan te bied in 'n kort tydjie, wat jou in twee dae soveel as moontlik sal toerus en prakties sal help om 'n gesonde, geseënde huwelik en gesin te hê.

 

Na afloop van die seminaar sal die aanbieders weer beskikbaar wees vir almal wat vrae het of hulp verlang op een of ander gebied.